مقالات

كَـوَّع واتنَهَّـــدْ ( الورقة السادسة )

 

مـــن أوراق أبي
الورقة السادسة


 

كَـوَّع واتنَهَّـــدْ     
 

 

فــقــــاعِِِ الــــدار واقــفــــه

شــــــــامخـــــــه... 

ماسكه فلأرض والأرض ماسـكاها

عَدّايِر من فوق رطب وبلح

رَبَط المُطلاع حواليها

اتنَحنَح وقال يا ساتر...

طالع نخله...

 وِصِــــــل فوق عند البلح… 

نَقّى رطب وبلح عشان العَجوَه والشقيق

العيد جاي يمكن نِعمل كعك

نزل من العالي وقال

جاركو لختيار قاعد فقاع الدار

مَلِّيت الصحن رطب و بلح

رحت عندو... الباب مفتوح

لبواب زمان كلها مفتوحه

قاعدعَلكيس أبو خط احمر

على حيطة الطينه راكز ضهرو

السٌّبحه في إيد والمنَشّه فَالتانيه

بِسبِّح و بِكِشّ الدّبّان

كلمتو ...اتنهد...اعطيتو بلحه

أشَّر عَتُمّو... واتنهد

متكلمش ولا كلمه...بس بيتنهد

دموعو على دقنو البيضه نزلت

واتنهد...

صرت اني كمان ...أتنهد

ليش ما تتكلم... سألتو

قِلّة الكلام احسن

اتكلّمنا كتير مفش فايده

من زمان بيدحكو علينا

واتنهد...

بكره... يمكن شهر يمكن سنه

واتنهد...

بترجعو...واتنهد

هُمَّ كمان بيدحكو عحالهم

واتنهد...

كل يوم بدله و عطر حلو

وسَوّاق وحَرَس

 واحنا ؟!

علكيس ابو خط احمر!...

فبيت الطينه  بنّام

دلف وسقعه وعرق وشوب

من الباب بحدِّ المشوار جراي

ولد زغير حافي

 جلَّبيتو قصيره و مّزَّعه

 رجليه مليانين جروح و نُقَز

برابيرو واصلين تُمّو

مَرَق جوّه عند امو

جاب برّاد الشاي وكمان كُبّايتين

حطهم و راح جراي بره يلعب

يمكن حَجله يمكن إم التَّحيَه

يمكن بطُبِّة الشرايط

يمكن بالكَرّوسه والقاضون

مد ايدو وقال ناولني لبريق

فتحت البعبوز وناولتو

بَزَق الميه... يمكن دُبّانه

 و يمكن إشي تاني واتنهد

ناولتو ابريق تاني

شرب وشرب... مسكين عطشان

الحمد لله قال واتنهد

بيّاره وكروم فيه عنب وخوخ ودُرّاق

والجمّيز البَلَمي

صريف الصبر عالدّاير

ومفتاح الدار معلّق في المسمار

بَقول يمكن...نرجع

فرحنا لما اجو من بَرّه

قلنا يمكن الفرج إجا معهم

أتريت الفرج كان جاي!

واحنا مش عارفين

قال واتنهد

كوَّع علمَسنَد واتنهد

صرت أني كمان اتنهد

كلّمتو مردش...حرّكتو متحركش

لتكلّم ولا تحرّك ولا تنهد

يمكن نام النومه لكبيره

ادعولو إنّو يلاقي عند ربو

الدار والكروم والبياره

 أحسن من الي كانو عندو في الدنيا

 

 

 

من كتابات أبي

في عز القايــله

محمد نجيب الاغا


 

 

 

اضغط هنا للتواصل أو التعرف على السيد ياسين محمد نجيب حمدان إسعيد حمدان الأغا

يمكنك تلقي أحدث الأخبار أول بأول بانضمامك لإحدى مجموعات الواتساب الخاصة بالعائلة من خلال الضغط هنـا

اظهر المزيد