وين إمي ياستي
تسعة و تلاتين شعبان
مرّو...
و تمنية و تلاتين رمضان
مرقو...
وتسعة وتلاتين قمر لشعبان هلّو...
عغيابك يامّه.....
***
ستي... وين إمي
يا ستي؟؟
إمي ... وين يا ستي
وين راحت إمي
يا ستي ...؟؟
مش في الاوضه
و لا على الفرشه!!
و لا عند الفرن يا ستي!
وينها يا ستي...؟؟
قولي ما تخبيش
وين راحت؟؟
دموعها سالت...
جِريِت على الفسطان لسمر
إمك تعـــ .. بانه وجــعا... نه
إمك!! يا ستي...
سكتت ستي، دموع و بس
دموع بدل الكلام...
راحت هناك... هناك يا ستي
بعيد يا ستي...و سكتت
سحلت الشاشه عن الراس
الشعر أبيض والقلب كمان
ستي بنتك وين؟
وين بعيد راحت...؟؟
إمك راحت و مش
راح ترجع يا ستي...
مش فاهم إيش بتقولي
سكتت وأني كمان سكتت
فكّرت و فهمت وعيطت
وفي حضنها قعدت...
مش دافي يا ستي...
هداك أدفى يا ستي
أدفى وأحلى و أزكى
يا ستي
يمكن البيض بكره يفقس
يا ستي
مين يِطعَم الصوصان
يا ستي؟
مين يغطّيني في الليل؟
مين يغسِلَّك فصطانك؟
مين يعجن و يطبخ؟
مين يخبز و يغسل؟
مين يعمل
كشك و دُقّه؟
مين يلبِّسني أواعي العيد
مين يزغرت لما أنجح؟؟
مين يفرح و مين يدعي؟
على مين أعيّد؟
إيد مين أبوس؟
مين يبوسني و يعيدني
مين يقعد جنبي و ني وجعان؟
ومين يعملي شاي
لما الراس يجع؟
مين يودّي الفقده
مين يمسك الشمع في العرس
مين يحمل الببو لما يعيط
مين و مين يا ستي
مين ياستي؟؟
الليل صار طويل...
والقمر ضوّه ضعيف
و الشمس زعلانه...
ناس بتيجي و ناس بتروح...
***
أدعو الغفور الرحيم
كل ما دقّ القلب و كل
ما طلعت الشمس و غابت
و كل ما تنفّس مؤ من
وكل ما أذن مؤذن
و كل ما طاف طائف
بالبيت الحرام أن يغفر
الله لك و يرحمك و يوسّع
عليك في قبرك
اللهم آميـــــن...
آميــــن يا رب العالمين...
[1] Manar Yousef Ali Alagha | شكر وتقدير | 05-08-2009
[2] علي يوسف محمد الاغا | شكر و تقدير | 06-08-2009