|
من أوراق أبي الورقة العاشرة قـرّب الـعيد
قرّب العيد وياريتهم يقربو قرّب العيد و الجوع بيزيد قرّب و الوَجع و الَبعد كمان بيزيد وين النخّوه وين... وين الرجوله وين... وين الشهامه والكرم وين وين الجيره والجيران وين وين عمر المختار وين... وين جميله وعبد القادر* وين وينك ياصلاح الدين الأقصى راح وعدو طاح وين رجالك يا صلاح الدين وينك ياعز الدين وياعبد القادر وينكو يامُناضلين و يامجاهدين تشوفو إللي بعدكو إيش عِملو فلسطين راحت و ضاعت والباقي على الطريق قرّب العيد والإم بتسّتنى أخوها وابنها يّعيّدوها قرّب العيد و الأخت بتستنى كمان... قرب العيد والأبو مفلّس قرّب العيد و الأبو قاعد في الدار من زمان قرّب العيد و الناس بتتفرج علينا قرّب العيد ولزغار بيستنوا أواعي جداد و المُرجيحَه كمان والكَعِك والمَعْمول قرّب العيد و الإم بتستننا يرجع يمكن في سجن اليهود و يمكن عند اصحاب اليهود ويابخت اليهود مَكتًر اصحابهم قرّب العيد ولبواب مسَكَرَهْ والسمك مش قادر يقرّب عالشاط قرّب العيد و والناس بتستنى الـفَــــرَجّ... من وين يا حسره لا من قرايب و لامن جيران الفرج من فوق يمكن زِِلزال ويمكن طوفان يمكن قَمِل ويمكن... هو قادر يعمل كل إشي يا كبار الظلم ظُلمات يُمّهِل ولا يُهّمِل قرّب العيد وكل عيد و انتو بخير ـــــــــــــــــــــــــــــــــــــــــــــــــــــــــــــ *المجاهد عبد القادر الجزائري جميع الحقوق محفوظة 2008
| |||
|
| |||
