مقالات

تـطلي بــلـح و عـنب ( الورقة الخامسة )

 

تـطلي بــلـح و عـنب


مَزكى البَلَحه مِن النخله

مزكى شَرتوحِة العِنب لمّا يخلص

تلاقيها فِدّاليه متخبّيه

مزكى اللّوزه المدفونه فرّمل

مزكى البندوره البعليه

مزكى البطيخه لما تبُجّها

وتقحف منها لا صحن و لا شوكه

مزكى البزيله الخضره والدنيا بتنطّر

و العدس لخضر

مزكى الصبره تقطعها بيدك

وتُفرُكها في الارض برجلك

وتقشّرها بصبعك عند الصبر

مزكى البيضه تشويها فلفرن

و كعب الكشك تدفنو فنّار

مزكى سلطة العجر

و طبيخ الخبّيزه من غير لحمه

مزكى نتفة الجبنه فى ايد

و الرغيف السّخن في التانيه

مزكى صحن الشرش بالبندوره

مزكى مرقة البيض والبصل

مزكى الدقّه مع الزيت

مزكى رجال زمان لابسين القمباز والساكو

والعقده والمرير

مزكاهم لما يمشو مع بعض

مزكاهم لما يقعدوا فى الديوان والشِقّ و المقعد

مزكاهم لما يجوّزو ولادهم

ويتحدّتو مع بعض

مزكى القعده معاهم

مزكى النحله لما تجري وراك وتقرصك

والخروف لما ينطحك

والبقره لما ترفصك

و لحمار لما يعنطز

مزكى الشوكه لما تنكسر فى الرجل

والشاي عَلحطب

مزكي قدرة العدس واللحمه فِطيز الفرن

مزكى دَخنِة النار فلعنين

مزكى الميّه فِلعَمّال

مزكى البابور لما يدَوِّر و الميّه السخنه تسيل

مزكى اللوز لما ينوِّر

والغنم وهِيه بترعى

مزكى البوبو لما يعيِّط

مزكى الشمس لما تغيب وتيجي العِتمه

مزكاهم لما يفطرو رمضان فدِّيوان

ولما يعملو ام علي في ختمة رمضان

و يعزمو اللي مايعملوش

مزكاهم يوم العيد بِعيّدو على بعض و مع بعض

مزكاهم لما يخبزو فراشيح

و يفتلو شعريّه و مفتول

مزكاهم لمايعملو شقيق و عَجوَه

ويعملو تطلي بلح و عنب

مزكاهم لما يكَسّرو اللوز و يجِدّو الزتون و يُعُصروه

مزكاهم لما يحصدو و يدرسو

مزكاهم وهُمّا راكبين علّوح

ويدَرُّو ويعبّو الكيس والشَليتَه

شعير و قمح و تبن

مزكاهم لمّا يعيّدونا قرش و تعريفه

مزكاهم لمّا يلعبو الحجلة

مزكاهم رايحين عالمدرسة

و مزكى شنتِتهُم القماش

مزكاهم أهل زمان

نومهم زاكي... لبسهم زاكي ... مشيهم زاكي..

و قعدتهم أزكى و أزكى

يجعل أيّامنا و أيّامكم كلها زاكيه

 

 

 

من كتابات أبي

بعد العصر..

شهر تمنيه سنة ألف تسمعيّة و خمسه و تمانين..

 

اضغط هنا للتواصل أو التعرف على السيد ياسين محمد نجيب حمدان إسعيد حمدان الأغا

اظهر المزيد