|
من اوراق ابي الورقة السابعة
| ||
| ابو قلب كبير قايم قاعد... رايح جاي طالع نازل نايم... و بحلم... تايِه و حَيران بدَوّر و بَسأل... ياناس دِلّوني قولولي وين راح؟؟ مشيت في الليل ... في النهار و بسأل كل ما لاقي حد اسأل كل الناس بيعرفوه كبار و زغار لكن مَحدِّش ردّ تاع الفلافل و الحمص ساكت الحلاق بانِج وبَيّاع العسل عسلو صار مش حلو سَكَّر دكانو و راح لكن مَحَدِّش رد الكل بانج و ساكت!!! لفّيت ما خَلّيت... هنه و هناك عالمعسكر رُحِت وعَقاع لقرين عرفح و عالبحر و المواصي عالسطر شرق و غرب و القراره ... قلت يمكن هناك عالدواوين ...لفّيت كل ما اسأل حد يبنج ويتنهد يمكن سافر... يمكن.. وين؟؟؟ وين سافر؟؟؟ عالاردن ولاّ الشام... لبنان... ولاّ تونس ...يمكن مصر؟... كيف اسأل و كيف ادَوِّر هناك يا منادي روح لُف و نادي متخليش حاره ولا شارع فكُل زقاق امشي و نادي دوّر و نادي... نادي واسأل يمكن... يمكن حد يقول يمكن حد يقدَر يتكلّم يمكن حد يقدَر يقول وين راح... وين؟ وين أبو قلب كبير؟؟... وين راح... أبو قلب أبيض؟ وين أبو إيدين نضاف وين؟... وين الجبل؟؟... وين الجمل راح؟ وين الفارس...وين؟؟ وين... الخَيَّال... وين؟؟ وين ابن الخال... وين؟؟ خَلّى لِحصان... و راح وين راح؟... معقول!!! نزل عن الحصان! معقول!!! معقول عِتِر لحصان وطاح! يمكن... يمكن لحصان طاح... العصافير ساكته ديك الجيران مَسَكَتِش من الصبح بدري بيصيح ناس... كتير هناك إشي واقف واشي قاعد عند باب الدار وفي العريشه جُوّه واقفين و قاعدين دخنه و قهوه وناس ساكتين كل شي بيصير إن كَنُّو نِزِل ... يا بخت الأرض إلّي نزل عليها ويابخت الإيدين و لِكتاف الي حملتو... ويابخت... ويابخت ويابخت الارض اللي حضنتو... (لله ما أخذ ولله ما أعطى) | ||
